Besnik Pula është mësimdhënës i sociologjisë në Haverford College në Pennsylvania të SHBA-ve. Po mbaron studimet për gradën doktor (Ph.D.) në Departamentin e Sociologjisë pranë University of Michigan. Studimet për MA i ka mbaruar në Georgetown University, kurse ka diplomuar në shkenca politike në Hunter College. Boton komente në shtypin shqip në Kosovë, kryesisht në të përditshmen Koha Ditore. Ka botuar studime në revista shkencore si Theory & Society, Nationalities Papers, Albanian Journal of Politics, Përpjekja dhe Polis. Gjithashtu ka kontribuar me kapituj në librat Sociology and Empire (Duke University Press) edituar nga George Steinmetz, Hegemonic Transitions, the State and Crisis in Neoliberal Capitalism (Routledge) edituar nga Yildiz Atasoy, A Case for Kosova: Passage to Independence (Anthem Press), dhe Conflict in South-Eastern Europe at the End of the Twentieth Century (Routledge). Disertacioni i tij përdorë teorinë neo-institucionaliste dhe atë të fushave të sociologut Pierre Bourdieu për të analizuar format e institucionalizimit të konfliktit politik, duke marrë si shembull empirik pasojat e centralizimit shtetëror në Shqipërinë periudhës midis dy luftërave botërore në dy zona të ndryshme agrare (malësitë e veriut dhe Shqipërinë e mesme dhe të jugut). Disertacioni bazohet në një hulumtimi afër njëvjeçar në Arkivin e Shtetit në Tiranë. Interesimet e tij intelektuale lidhet me sociologjinë krahasuese dhe historike, sociologjinë politike, sociologjinë e organizatave dhe të nacionalizmit.
Është aktiv në një numër shoqatash dhe lëvizjesh në Kosovë, si dhe një nga themeluesit e Departamentit për Kritikë Sociale në Prishtinë. Shkrimet në këtë blog janë kryesisht ribotime të artikujve që janë botuar në shtyp.
